Қазақстандық көкпаршылар Алматы облысында көкпар және көкбөрі ойындары бойынша оқу-жаттығу жиындарын өткізіп жатыр,.
«Қазір спортшыларымыздың дайындықтары жақсы. Басты қарсылас ретінде Қырғызстан мен Өзбекстанды айтар едім. Көкпардан жеңетінімізге сенімдіміз, ал көкбөрі ойынынан мүмкіндіктеріміз тең дәрежеде. Біраз жылдан бері көкбөрі ойнаған жоқпыз. Десе де жеңу үшін барлық мүмкіндігімізді пайдаланамыз», – деді көкпардан ұлттық құраманың бас бапкері Ақылбай Манкеев.
Қазір оқу-жаттығу жиындары туризм және спорт министрлігінің ұлттық және ат спорты түрлері орталығының қолдауымен ұйымдастырылып отыр.
Көкпардан ұлттық құрама мүшесі Наурызбай Қалтаев көкпар мен көкбөрінің айырмашылығын айтып берді.
«5-Дүниежүзілік көшпенділер ойындарына дайындығымыз жоғары деңгейде. Екі спорттың айырмашылығы тайм санында – көкбөріде үш тайм ойналады, ал көкпарда – екеу. Көкбөріде қазандыққа, ал көкпар жерге сызылған шеңберде ойналады», – деді Наурызбай Қалтаев.
Көкпар ойынында белгілі бір уақыт ішінде қай команда немесе жеке қатысушы көп серке салса, сол жеңімпаз болады. Ойыншылар бір-бірімен серкені тартысып, қарсыластың жолын бөгеуге тырысады.
Көкбөрі ойынының ережелері көкпарға ұқсас, бірақ негізгі айырмашылығы — серкені шеңберге жеткізу.