Құрлықтық хоккей лигасында (ҚХЛ) өнер көрсететін елордалық «Барыс» өз алаңында Ресейдің «Нефтехимик» (Нижнекамск) клубымен кездесіп, жеңіліс тапты.
Ойынның 23-минутында қонақтар сапынан Никита Хоружев есеп ашты. Араға екі минут салып, Андрей Белозёров таблодағы көрсеткішті 2:0-ге жеткізді. Бір минут өтпей, Кирилл Панюков бір шайбамен жауап берді. Алайда Белозёров көп ұзамай тағы бір мәрте мергендік танытып, дубль авторы атанды — 3:1.
33-минутта Дінмұхамед Қайыржан есеп айырмасын қысқартқанымен, шешуші сәттерде «Нефтехимик» басымдықты сақтап қалды. Қонақтардан Иван Николишин (47′) және хет-трик жасаған Андрей Белозёров (51′) тағы екі шайба соғып, матчтың тағдырын шешті — 5:2.
Осылайша, «Барыс» қатарынан төртінші ойында жеңіліп отыр. Енді елордалық клуб өз алаңында тағы үш матч өткізеді:
5 қараша — «Салават Юлаев» (Уфа),
7 қараша — «Автомобилист» (Екатеринбург),
9 қараша — «Металлург» (Магнитогорск).