Кеше Өзбекстанда ресми түрде 55 мың орындық стадионның құрылыс жұмыстары басталды. Ал Қырғызстанда келесі жылы 51 мың көрерменге арналған «Бішкек Арена» ашу жоспарланып отыр.
Өзбекстан Президенті Шавкат Мирзияев Ташкенттегі жаңа стадион құрылысының алғашқы кірпішін қадады.
«Бүгін қалап жатқан іргетас – ертеңгі жеңістеріміздің негізі», – деді Мирзияев.
Жоба құны – 100 млн доллар. Стадион Азиядағы ең заманауи ареналардың бірі. Арена жасыл энергиямен жұмыс істейді және интеллектуалды технологиялармен жабдықталады. Өзбекстан Президентінің айтуынша, 2027 жылы Өзбекстан мен Әзербайжан U20 футбол бойынша әлем чемпионатын өткізеді.
Финал мен жартылай финал матчтары кемінде 50 мың көрерменге арналған стадионда өтуі тиіс, сол себепті Ташкентте ФИФА талаптарына толық сәйкес аренаны салу жоспарланған. Жоба аяқталған соң ол Орталық Азиядағы ең ірі стадионға айналуы мүмкін, қазіргі рекорд Түрікменстан астанасы Ашхабадтағы 45 мың орындық көпсалалы стадионда.
Сондай-ақ Қырғызстандағы «Бішкек Арена» жобасы белсенді түрде жүргізілуде. Стадион 2026 жылдың күзінде пайдалануға беріледі және бір мезгілде 51 мың көрерменді қабылдай алады. Жергілікті БАҚ құны 60 миллион доллар деп хабарлады. Қырғыз билігі бұл жобаның 2031 жылы Азия кубогын өткізуге өтініш беруде негізгі артықшылық болатынына сенімді.
Қазақстанға келетін болсақ, соңғы бір жылда елде бірнеше жаңа стадион салу уәде етілді. Олардың жобасы ФИФА стандарттарына сәйкес жасалған. Ең ірі жоспарланған алаң – Алматыдағы жаңа стадион, оның сыйымдылығы 35 мың көрерменге арналған. Дегенмен сарапшылар мен жанкүйерлер қала үшін әлдеқайда үлкен аренаның қажет екенін айтады. Қазіргі таңда Қазақстандағы басты футбол стадионы – «Астана Арена», 30 мың көрерменге арналған.
Салыстыру үшін айта кетсек, Ташкентте қазіргі уақытта екі 35 мың орындық стадион бар, сонымен қатар 55 мың орындық жаңа стадион құрылысы басталған. Өзбекстанда ФИФА мен Азия футбол конфедерациясының талаптарына сәйкес 10-нан астам футбол алаңы қолданысқа енгізілген.