Аралас жекпе-жек бойынша қазақстандық шебер Асу Алмабаев (20-2) UFC-дегі үшінші жекпе-жегін өткізді. Лас-Вегаста болған турнирде америкалық Хосе Джонсоннан (16-9) басым түсті.
Асу үш раундқа созылған жекпе-жекте төрешілердің бірауыз шешімімен жеңіске жетті. Отандасымыз алғаш рет жарысты басты кардында бақ сынады. Қазақстандық спортшы бірнеше рет қылқындыру әдісімен жекпе-жекті ертерек аяқтауға тырысқан. Алайда қарсыласы әдістерге шыдап бағып, соңына дейін шайқаса білді.
Алмабаев өткен жылдың тамыз айынан бері UFC-де өнер көрсетіп келеді. Бұған дейін Оди Осборн (12-7-1) және Си Джей Вергараны (12-5-1) жеңген еді.