Семей қаласында бокстан Қазақстан чемпионатының финалдық жекпе-жектері өтіп жатыр. 60 келі салмақта Серік Теміржанов пен Бибарыс Жексен жұдырықтасып, біріншісінің мерейі үстем болды.
Бірінші раундта Жамбыл облысының өкілі Бибарыс Жексен (4:1 есебімен) басым түссе, екінші раундта дәл сондай есеппен Павлодар облысының намысын қорғаған Серік Теміржанов жеңісті өз пайдасына жазды. Ал шешуші, үшінші раундта Теміржанов айқын басымдық танытып, төрешілердің бірауыздан шешімімен (5:0) жеңіске жетті. Жалпы есеп – 4:1 Теміржановтың пайдасына.
Айта кетейік, Серік Теміржанов – 2021 жылғы әлем чемпионатының және 2022 жылғы Азия чемпионатының күміс жүлдегері. Ал жас боксшы Бибарыс Жексен жуырда ғана Англияның Ливерпуль қаласында өткен әлем чемпионатында өнер көрсетіп, жүлдесіз қалған еді.