Кәсіпқой бокста жеңіліп көрмеген қазақстандық Садриддин Ахмедов (15-0-1, 13 KO) 22 қараша күні рингке оралатыны белгілі болды.
Бокс кеші АҚШ-тың Калифорния штатындағы Лонг-Бич қаласында өтеді. Онда Ахмедов мексикалық нокаутшы Эдгардо Веласкеспен (16-2, 16 KO) жұдырықтасады. Кездесу бірінші орта салмақта өтеді және 10 раундқа жоспарланған.
Бұл Ахмедовтың сәуір айынан кейінгі алғашқы жекпе-жегі болмақ. Сол кезде ол АҚШ-тың Коммерс қаласында өткен айқаста мексикалық Элиас Эспадаспен (23-7-1, 16 KO) тең түскен еді.
Ал Веласкес соңғы рет 2024 жылдың тамызында рингке шыққан. Ол отандасы Хосе де Хесус Адаме-Чиомен (14-0-1, 6 KO) кездесіп, төрешілердің бірауыздан шығарған шешімімен жеңіліп қалған.
