21 желтоқсанда Қазақстан және КСРО Халық әртісі, «Отан», «Құрмет», «Қазақстанның Еңбек ері» ордендерінің иегері Асанәлі Әшімов дүниеден өтті. Ұлт руханиятына өлшеусіз үлес қосқан дара тұлғаның қазасы күллі қазақ жұртын қайғыға батырды.
Марқұмның төртінші жары, дәрігер Бағдат Әшімова Stan.kz тілшісіне берген сұхбатында актермен бірге өткізген өмірі, жастық шағы мен көпшілік біле бермейтін отбасылық сырлары туралы кеңінен әңгімеледі.
«Атағына қызықты» деген сөздерге мән бермедім
Бағдат Әшімованың айтуынша, өзінен 34 жас үлкен Асанәлі Әшімовтің жары болу бастапқыда оңай болмаған. Қоғамда түрлі әңгімелер айтылып, «атағына қызығып келді», «жағдайын жасап алмақшы» деген қаңқу сөздер де тараған.
«Ондай әңгімелерге мән берген жоқпын. Мен үшін ең бастысы – оның денсаулығы мен тыныштығы болды. Асанәлі ағаның қандай адам екенін, қандай қасіреттерді бастан өткергенін жақын таныған соң, оны түсініп, қолдауды өзіме парыз санадым», – дейді ол.
Қарапайым ауылдан – Алматыға дейінгі жол
Бағдат Әшімова Алматы облысында дүниеге келген. Сегіз балалы отбасында өскен ол 15 жасынан кейін Алматыға келіп, медициналық училищені тәмамдап, медбике болып жұмыс істеген. 90-жылдардағы қиын кезеңде кәсіппен айналысып, отбасын асырағанын да жасырмай айтты.
«Ұзақ жылдар бойы тұрмыс құруды емес, отбасымды асырауды бірінші орынға қойдым. Сол себепті 30 жасқа дейін өз өмірімді түгелдей жақындарыма арнадым», – дейді ол.
Тағдырлы таныстық
Асанәлі Әшімов пен Бағдат Әшімова ауруханада танысқан. Ол кезде актер анасы мен отбасынан айырылып, өмірдің ауыр кезеңін бастан өткеріп жүрген екен. Дәл сол сәттен бастап араларында ерекше байланыс орнаған.
«Бір күні ол кісі маған «Жан бөлек» кітабын сыйлады. Сол кітапты оқып отырып, мен осы адамды бақытты ете аламын ба деп ойладым», – деп еске алады Бағдат Әшімова.
Алғашында ата-анасы бұл некеге қарсы болғанымен, уақыт өте келе келісім беріп, 2002 жылы екеуі шаңырақ көтереді. 2008 жылы жұптың ортақ ұлы – Асанәлі дүниеге келген.
Алғашқы отбасының қасіреті
Сұхбат барысында Бағдат Әшімова актердің алғашқы жары Майра апай мен екі ұлының қазасы туралы да алғаш рет ашық айтты. Оның айтуынша, бұл қайғылар Асанәлі Әшімовтің өміріндегі ең ауыр соққылардың бірі болған.
Үлкен ұлы Мәди ауыр дерттен кейін отадан соң оңала алмай көз жұмса, араға бірнеше ай салып жүрек ауруынан кенже ұлы Сағи қайтыс болған. Ал жары Майра сирек кездесетін ауыр дерт – склеродермиядан өмірден өткен.
«Ол кісілердің бәрі Асекеңнің жүрегінде өшпес із қалдырды. Кейде өткенін еске алып, қатты қиналатын», – дейді жары.
Өнерге қайта оралу
Осы ауыр қайғылардан кейін Асанәлі Әшімов біраз жыл өнерден алыстап, тек араға шамамен он жыл салып қайта сахна мен киноға оралған. Бағдат Әшімованың айтуынша, бұл жолда оның басты тірегі – рухани сабыр мен ішкі төзім болған.
Асанәлі Әшімовтің өмірі мен тағдыры – тек өнер жолы ғана емес, үлкен сынақтар мен сабырдың, махаббат пен адалдықтың айқын көрінісі болып қалды.
