Ресейдің Красноярск қаласында өткен Иван Ярыгин атындағы халықаралық турнир Қазақстан әйелдер күресі үшін табысты аяқталды. Ел құрамасы жарыс қорытындысында 1 алтын, 2 күміс медаль жеңіп алды.
Қазақстан күрес федерациясының мәліметінше, 2026 жылдың алғашқы ресми халықаралық бәсекесінде 72 келі салмақ дәрежесінде белдескен Жәмилә Бақбергенова қарсыластарын айқын басымдықпен жеңіп, алтын жүлдеге қол жеткізді.
Сондай-ақ, 55 келі салмақта Лаура Алмағанбетова, ал 59 келіде Виктория Хусаинова финалдық белдесулерде ғана есе жіберіп, күміс медаль иеленді.
Айта кетейік, Иван Ярыгин турнирі – әлемдік күрестегі ең беделді жарыстардың бірі саналады. Бұған дейін Жәмилә Бақбергенованың Мажарстанда өткен халықаралық турнирде күміс жүлде алғаны хабарланған болатын.
