Бүгін Астанада теннистен Дэвис кубогының Бірінші әлемдік тобы аясында Қазақстан мен Монако арасындағы плей-офф матчы өтеді.
Кортқа бірінші болып сағат 15.00-де әлемнің 10-ракеткасы Александр Бублик пен монаколық Уго Нис шығады. Содан кейін кортта Александр Шевченко мен Валантен Вашро өнер көрсетеді.
Сенбіге үш кездесу белгіленген. Beeline Arena ұлттық теннис орталығында алдымен Александр Шевченко – Бейбіт Жұқаев және Роман Арнеодо – Уго Нис жұптары ойнайды.
Бұдан соң қос команданың көшбасшылары Александр Бублик пен Валантен Вашро шеберлік байқасады. Сосын ешқандай өзгеріс болмаса, Александр Шевченко мен Уго Нис доданы түйіндейді.
Үш ойында жеңген команда жеңімпаз атанып, алдағы жылы болатын Дэвис кубогының іріктеу турына жолдама алады.
