Германиялық велошабандоз, «XDS Astana Team» құрамасының өкілі Макс Кантер Францияда өтіп жатқан беделді Париж-Ницца көпкүндік жарысының екінші кезеңінде жеңімпаз атанды.
Ұзындығы 187 шақырымды құраған кезең Эпон – Монтаржи бағыты бойынша өтті. Макс Кантер қашықтықты 4 сағат 25 минут 07 секундта жүріп өтіп, мәре сызығын бірінші болып кесті.
Екінші орынға «Red Bull-BORA-hansgrohe» командасының жаңа зеландиялық спортшысы Лоренс Пити ие болса, үшінші орынды бельгиялық Яспер Стюйвен («Soudal Quick-Step») иеленді.
«XDS Astana Team» сапындағы тағы бір велошабандоз, нидерландтық Майк Тёниссен кезеңді 17-орында аяқтады. Колумбиялық Харольд Техада 32-орынға тұрақтаса, қазақстандық Евгений Федоров 33-нәтиже көрсетті. Ал тағы бір қазақстандық спортшы Николя Винокуров 37-орынға жайғасты.
Команданың өзге өкілдері де жарысты аяқтады: италиялық Никола Кончи 58-орын алса, нидерландтық Даррен ван Беккум 94-орында мәреге жетті.
Екі кезеңнің қорытындысы бойынша жалпы есептегі «XDS Astana Team» велошабандоздарының орындары да белгілі болды.
Команда ішінде ең жоғары нәтижені Майк Тёниссен көрсетіп, жалпы классификацияда 10-орында тұр. Ол жарыс көшбасшысынан 12 секундқа қалып келеді.
Николя Винокуров жалпы есепте 21-орында болса, Харольд Техада 28-орынды иеленіп отыр. Екеуі де көшбасшыдан 12 секундқа қалып келеді.
Даррен ван Беккум 82-орында орналасқан. Евгений Федоров 112-орында және көшбасшыдан 3 минут 25 секундқа артта. Екінші кезеңнің жеңімпазы Макс Кантер жалпы есепте 122-орында (артта қалу – 4 минут 48 секунд). Ал Никола Кончи 137-орында, оның айырмасы 6 минут 30 секунд.
