8-10 мамыр аралығында Алматы қаласында даңқты қазақ палуаны Қажымұқан Мұңайтпасұлының 155 жылдығына арналған ірі халықаралық күрес жарысы өтеді. Дода Балуан Шолақ атындағы Спорт сарайында ұйымдастырылып, оған 10 елден 700-ден астам спортшы қатысады деп күтілуде.
Алматылық кілемге Қазақстан, АҚШ, Ресей, Моңғолия, Италия, Қытай, Грузия, Қырғызстан, Беларусь және Өзбекстан балуандары шығады. Қатысушылар құрамының кеңдігі жарыстың жоғары халықаралық деңгейін айқындап, жанкүйерлерге тартысты әрі әсерлі белдесулерге толы бағдарлама ұсынады.
Турнир ұйымдастырушысы, «Ардагерлер аланы» қорының төрағасы Ерлан Малаевтың айтуынша, бұл дода қарапайым жарыс шеңберінен әлдеқайда ауқымды.
Жарыс тарихи жадыны сақтау, ұрпақтар сабақтастығын нығайту және спорттағы патриоттық құндылықтардың маңызын дәріптеуге бағытталған. Сонымен қатар, «Ардагерлер аланы» бастамасымен Балуан Шолақ атындағы спорт сарайында Қажымұқанға арналған мұражай көрмесі ұсынылады.
Жарыста ардагерлер қозғалысына ерекше көңіл бөлінбек. Тәжірибелі спортшылар үшін бұл тек қайта кілемге шығу мүмкіндігі емес, жас буынға күрес дәстүрін, қарсыласқа құрмет пен нағыз спорт рухының философиясын жеткізетін маңызды миссия. Дәл осы ардагерлер қазақстандық күрес мектебінің сабақтастығын сақтап келеді.
Жарыстың басты оқиғаларының бірі – өткен жылғы финалистер, қазақстандық Азамат Байгабылов пен қырғызстандық Талант Бегалиев арасындағы тартысты кездесу болмақ. Бұл белдесу турнирдің ең көрнекті сәттерінің біріне айналуы күтілуде.
Ерлан Малаев жарысты ұйымдастыруға қолдау көрсеткен, Омар Алиев жетекшілік ететін Алматы қаласының грек-рим, еркін және әйелдер күресі федерациясына алғыс білдірді.
«Бұл тек спорттық жарыс емес, күреске өмірін арнаған жандарға, тарих пен дәстүрге деген құрметтің символы. Барша отандастарды алдағы додаға келіп, мерекелік күрес атмосферасын сезінуге шақырамын», – деді ұйымдастырушы.
