Қазақстанның бірінші ракеткасы, әлемдік рейтингте 10-орында тұрған Александр Бублик Аустралия ашық чемпионатының екінші кезеңіне жолдама алды.
Отандасымыз алғашқы матчында әлемнің 48-ракеткасы, АҚШ өкілі Дженсон Бруксбимен кортқа шықты. Бублик бұл кездесуде сенімді ойын көрсетті. Отандасымыз қарсыласын үш сетте де бердей есеппен жеңді – 6:4, 6:4, 6:4. Екі сағат 4 минутқа созылған ойында Александр Бублик 12 эйс жасап, 11 брейк-пойнттың төртеуін тиімді пайдаланды. Ал Бруксби 4 эйспен және бір ғана брейкпен (8 брейк-пойнт) шектелді.
Үшінші айналымға шығу үшін Бублик әлемнің 55-ракеткасы, Мажарстан өкілі Мартон Фучовичпен кездеседі. Фучович алғашқы кезеңде әлемнің 47-ракеткасы, аргентиналық Камило Уго Карабельиді 7:6 (7:5), 6:1, 6:2 есебімен жеңді.
