WBC ұйымы қазақстандық боксшы Мейірім Нұрсұлтановты (20-0, 13 КО) әлем чемпиондығы үшін жекпе-жектен тағы да тыс қалдырды.
Нұрсұлтанов екі жылдан астам уақыт WBC ресми үміткері ретінде тіркелген, алайда титулдық мүмкіндікті күту үшін ешқандай жекпе-жек өткізген жоқ.
Кеше WBC чемпионы Карлос Адамес (24-1-1, 18 КО) 31 қаңтарда Нью-Йоркте Теофимо Лопес (22-1, 13 КО) пен Шакур Стивенсон (24-0, 11 КО) бокс кешінің андеркартында белбеуін қорғайтыны белгілі болды. Адаместің қарсыласы – америкалық Остин «Аммо» Уильямс (19-1, 13 КО), ол WBC рейтингінде алтыншы орында тұр. Нұрсұлтановтың орнына Адамес – Уильямс жекпе-жегін өткізуімен уақытша чемпион Хесус Рамос разы болмауы мүмкін.
Нұрсұлтановқа титулдық жекпе-жек неге берілмеді?
Бұрын Уильямс IBF ресми үміткері ретінде WBO және IBF чемпионы Жәнібек Әлімханұлы (17-0, 12 КО) мен Эрисланди Лара (32-3-3, 19 КО) арасындағы жекпе-жектің жеңімпазымен жұдырықтасуы тиіс еді. Алайда қазақстандық боксшының допинг дауы себепті жекпе-жек тоқтатылды.
8 қаңтарда Әлімханұлының B сынамасы ашылады, оның нәтижесіне байланысты жазалау шаралары қабылдануы мүмкін. Қазақстандық команда титулдардан айырылу қаупіне ие.
Остин Уильямстың мансабы
29 жастағы Уильямс 2019 жылы британдық промоутер Эдди Хирнмен келісімшартқа отырған алғашқы америкалық боксшылардың бірі. DAZN компаниясымен сегіз жылға $1 млрд келісімшартқа отырған. Уильямстың белгілі қарсыластары қатарында Стив Роллс пен Хамза Шираз бар.
