Кеше Александр Бублик Гонконгта өткен Hong Kong Open турнирінде жеңіске жетіп, ATP әлемдік рейтингінде 11-орыннан 10-орынға көтерілді. Осылайша ол ерлер арасындағы ATP рейтингінің ТОП-10 қатарына енген алғашқы қазақстандық теннисші атанды.
Қазақстандық өзге спортшылардың да көрсеткіштері жақсарды. Александр Шевченко 106-орыннан 104-орынға жоғарыласа, өткен аптада Бангалор турнирінің финалына дейін жеткен Тимофей Скатов бірден 40 сатыға көтеріліп, 235-тен 195-орынға орнықты.
Әйелдер арасында Қазақстанның бірінші ракеткасы Елена Рыбакина WTA рейтингінде 5-орнын сақтап қалды. Ал Юлия Путинцева 74-орыннан 105-орынға төмендеді. Жұптық сында Анна Данилина 14-орында қалды.
Финал қалай өтті?
ATP-250 санатындағы Гонконг турнирінің финалында Бублик әлемдік рейтингтің үздік бестігіне енетін италиялық Лоренцо Музеттимен кездесті. Қарсыластар бұған дейін үш рет ойнап, жеке есепте 2:1 есебімен қазақстандық теннисші алда тұрған еді.
Алғашқы сет аса тартысты өтіп, тай-брейкте Бублик 7:6 (7:2) есебімен басым түсті. Екінші партияда да ойын тең өрбігенімен, 3:2 кезінде Музетти оң қолындағы жарақатына байланысты дәрігер көмегіне жүгінді. Үзілістен кейін Александр қарқынын күшейтіп, сетте 6:3 есебімен жеңіске жетті.
Бұл жеңіс Александр Бублик үшін тарихи болды. Ол мансабында тұңғыш рет әлемнің үздік он теннисшісінің қатарына еніп, Қазақстан теннисі тарихында бұрын-соңды болмаған жетістікке қол жеткізді.
