Чемпиондар лигасының 1/16 финалындағы алғашқы матчта «Бенфика» өз алаңында «Реал Мадрид» клубынан 0:1 есебімен жеңіліп қалды.
Лиссабонда өткен кездесудің тағдырын 50-минутта соғылған жалғыз гол шешті. Гол авторы – Винисиус Жуниор.
Матч барысында бірнеше даулы сәт орын алды. Голдан кейін Винисиус бұрыштама жалаушасы маңында трибунаға ишара жасап, алаң иелерінің ойыншыларының ашуын туғызды. Соның салдарынан Винисиус мен Джанлука Престианни арасында қақтығыс болды. Кейін мадридтік клубтың ойыншысы төрешіге өзіне нәсілшілдік сипаттағы сөздер айтылғанын жеткізген. Осы оқиғаға байланысты матч біраз уақытқа тоқтатылды.
Ойынды басқарған француз төрешісі Франсуа Летесье Винисиусқа екінші сары қағаз көрсетпеді. Ал «Бенфиканың» бас бапкері Жозе Моуринью төрешімен сөзге келіп, алаңнан қуылды. Сондықтан ол 25 ақпанда Мадридте өтетін қарымта кездесуде командасына көмектесе алмайды.
