Моңғолияның Ұлан-Батор қаласында өтіп жатқан бокстан Азия чемпионатында Қазақстан әйелдер құрамасы тағы бір спортшысынан айырылды.
54 келі салмақта сынға түскен Элина Базарова 1/8 финалда үндістандық Притимен қолғап түйістіріп, төрешілердің бірауыздан шығарған шешімімен (5:0) жеңіліп қалды. Нәтижесінде қарсыласы ширек финалға өтті.
Бұл күн тағы бір қазақстандық боксшы үшін сәтсіз аяқталды. 51 келі салмақта өнер көрсеткен Жазира Орақбаева КХДР өкілі Кум Бель Анға қарсы жекпе-жекте жарақат алып, кездесуді мерзімінен бұрын тоқтатуға мәжбүр болды.
Айта кетейік, Азия чемпионаты World Boxing ұйымының аясында өтіп жатыр және 10 сәуірге дейін жалғасады.
