Қазақстандық боксшы, орта салмақтағы WBO және IBF тұжырымдары бойынша әлем чемпионы Жәнібек Әлімханұлы алдағы біріккен титулдық жекпе-жек алдында допинг тест тапсырып, нәтижесін жариялады.
Qazaq Style лақап атымен танымал спортшы бұл туралы Instagram-парақшасында хабарлады. Ол Stories-те қан сараптамасының суретін бөлісіп, таза спортты әрдайым қолдайтынын атап өтті.
Мен қашанда таза спортты қолдаймын. Спортшының допинг қолдануына қарсымын. Біз VADA-ға тест тапсырдық, кеше нәтижесі келді — барлығы таза, – деп жазды Әлімханұлы.
Айта кетейік, Жәнібек 6 желтоқсанда АҚШ-тың Техас штатындағы Сан-Антонио қаласында өтетін жекпе-жекте WBA белбеуінің иегері, 42 жастағы кубалық Эрисланди Ларамен кездеседі.
1993 жылы 1 сәуірде дүниеге келген Жәнібек Әлімханұлы әуесқой бокста 2013 жылғы әлем чемпионы, сондай-ақ Азия чемпионатының жеңімпазы. Кәсіпқой рингте 2015 жылдан бері 17 жекпе-жек өткізіп, барлығында жеңіске жеткен.
