Өзбекстан құрамасы мен «Манчестер Сити» клубының қорғаушысы Абдуқодир Хусановтың трансферлік құны рекордтық деңгейге жетті. Танымал Transfermarkt порталының маусым айындағы жаңартуы бойынша 22 жастағы футболшының нарықтық бағасы 15 миллион еуроға өсіп, 50 миллион еуроны құрады.
Осы көрсеткіштің арқасында Хусанов Азиядағы ең қымбат футболшы атанып, өзбек футболы тарихындағы абсолютті рекордты жаңартты. Сонымен қатар ол Англия Премьер-лигасында өнер көрсететін посткеңестік елдер өкілдері арасындағы ең қымбат ойыншы мәртебесіне ие болды.
Transfermarkt сарапшылары өзбекстандық қорғаушының ағылшын футболына қысқа уақыт ішінде сәтті бейімделгенін ерекше атап өтті. Олар Хусановтың соңғы айларда «Манчестер Сити» сапындағы маңызды ойыншылардың біріне айналғанын жеткізді.
2025/26 жылғы маусымда Абдуқодир Хусанов барлық турнирде 37 матчқа қатысып, қорғаныстағы сенімді ойынымен көзге түсті. Статистикасында гол немесе нәтижелі пас болмағанымен, оның қорғаныстағы тұрақты әрі сапалы ойыны жоғары бағаланды.
Маусым барысында Хусанов екі рет клубтың ай үздігі атанды. Ол қаңтар және наурыз айларында жанкүйерлер мен клуб мамандарының таңдауы бойынша үздік ойыншы деп танылды.
Өзбекстандық футболшы үшін Англиядағы алғашқы толыққанды маусым өте табысты өтті. Ол «Манчестер Сити» құрамында Англия кубогы мен Лига кубогын жеңіп алып, кәсіби мансабындағы маңызды жетістіктердің біріне қол жеткізді.
Хусановтың трансферлік құнының күрт өсуі оның Еуропа футболындағы беделінің артып келе жатқанын көрсетеді. Сарапшылардың пікірінше, жас қорғаушы алдағы жылдары әлемдегі ең үздік қорғаушылардың қатарына қосылуға толық мүмкіндігі бар.
