Қазақстанның үздік теннисшісі Елена Рыбакина (WTA №5) Аустралияның Брисбен қаласында өтетін WTA 500 санатындағы турнирге үшінші нөмірмен тіркелді.
Турнир кестесінде ол әлемнің бірінші ракеткасы Арина Соболенкомен бір топта орналасқан.
Жоғары рейтингінің арқасында Рыбакина алғашқы айналымды өткізбей, жарысты бірден екінші кезеңнен бастайды. Бұл кезеңдегі оның қарсыласы америкалық Эшлин Крюгер (WTA №44) мен іріктеуден өткен «лаки лузердің» арасындағы матчта анықталады.
Қазақстандық теннисші ширек финалда ресейлік Екатерина Александровамен (№7) жолығуы мүмкін. Ал жартылай финалдағы ықтимал қарсыласы ретінде қазіргі әлемдік рейтинг көшбасшысы Арина Соболенко аталып отыр.
Еске сала кетейік, Елена Рыбакина 2024 жылы Брисбен турнирінің чемпионы атанған. Сол кезде финалда ол дәл осы Арина Соболенкодан басым түскен болатын.
