Бірнеше жыл үзілістен кейін үлкен спортқа қайта оралған Әйгерім Сәттібаева айтарлықтай нәтижеге қол жеткізді. Ол Семей қаласында өтіп жатқан бокстан әйелдер арасындағы ел чемпионатының финалына шықты.
Әйгерім ең жеңіл салмақ – 48 келіге дейінгі санатта өнер көрсетіп, жартылай финалда қызылордалық Ақбота Болатты айқын басымдықпен жеңді. Осылайша, спортшы 15 жылдық үзілістен кейін ел чемпионатының финалына жолдама алды.
34 жастағы Әйгерім Сәттібаева – тек рингте емес, өмірде де көпке үлгі көрсетіп жатыр. Ол 5 баланың анасы, сонымен қатар бокстан Азия чемпионы және Азия чемпионатының қола жүлдегері саналады.
Әйгерімнің жары – әйгілі қазақстандық боксшы, Бүкіләлемдік бокс сериясының (WSB) екі дүркін чемпионы Олжас Сәттібаев. Ерлі-зайыпты спортшылар еліміздің боксына зор үлес қосып келеді және жас буынға үлгі болып отыр.
