FIFA президенті Джанни Инфантино Ванкуверде өткен ұйым конгресінде Иран құрамасының 2026 жылғы әлем чемпионатына қатысатынын және матчтарын АҚШ аумағында өткізетінін ресми түрде растады.
Инфантиноның айтуынша, бұл шешім өзгермейді және футболдың басты миссиясы – халықтарды біріктіру.
«Иран әлем чемпионатына қатысады. Әрине АҚШ-та ойнайды. Біз адамдарды біріктіруге тиіспіз. Бұл — біздің жауапкершілігіміз. Футбол әлемді біріктіреді», – деді ол.
2026 жылғы әлем чемпионатының топтық кезеңінде Иран құрамасы келесі командалармен кездеседі:
- Жаңа Зеландия
- Бельгия
- Мысыр
Алдын ала жоспар бойынша барлық ойындар АҚШ аумағында, атап айтқанда Лос-Анджелес пен Сиэтл қалаларында өтеді.
Бұған дейін не айтылған еді?
Соңғы уақытта Таяу Шығыстағы геосаяси жағдайдың шиеленісуіне байланысты Иран құрамасының турнирден бас тартуы немесе матчтарды АҚШ-тан тыс жерде өткізуі мүмкін деген ақпарат тараған болатын.
Сондай-ақ ойындарды Мексикаға көшіру нұсқасы да қарастырылғаны хабарланған. Алайда Клаудия Шейнбаум бұл сценарийдің логистикалық тұрғыдан қиын екенін айтып, мұндай шешім қабылданбайтынын мәлімдеген.
Конгресс барысында Иран делегациясы, оның ішінде федерация президенті Мехди Тадж, Канадаға кіре алмады. Канада билігі бұл шешімді Тадждың Ислам революциясы сақшылары корпусымен ықтимал байланысымен түсіндірді.
Канада премьер-министрі Марк Карни мұндай байланысы бар тұлғаларға елге кіруге тыйым салынатынын айтты. Ал сыртқы істер министрі Анита Ананд визалардың кері қайтарылғанын растады.
АҚШ президенті Дональд Трамп Иран құрамасының турнирге қатысуына қарсы емес екенін білдірді.
«Егер Джанни солай десе – мен қарсы емеспін. Қатыса берсін», – деді ол.
Трамп футбол саясаттан тыс болуы тиіс екенін атап өтті.
2026 жылғы футболдан әлем чемпионаты үш елде өтеді:
- АҚШ
- Канада
- Мексика
Бұл турнир тарихтағы ең ауқымды мундиальдардың бірі болмақ.
Джанни Инфантино сондай-ақ 2027 жылы өтетін FIFA президенті сайлауына қайта қатысуға ниетті екенін мәлімдеді. Жеңіске жеткен жағдайда, ол 2031 жылға дейін қызметін жалғастыра алады.
